Greining: Kaupmáttur launa lækkar áfram til ársloka

„Á sama tíma eru ekki frekari samningsbundnar launahækkanir í farvatninu fyrr en um mitt árið, auk þess sem launaskrið er nú með minnsta móti vegna mikils slaka á vinnumarkaði. Ef verðbólguþróun verður hins vegar í takti við spár okkar má búast við að raunlaun taki að hækka að nýju á næsta ári," segir í Morgunkorni greiningarinnar þar sem fjallað er um málið og vitnað í nýjar tölur Hagstofunnar frá því í morgun.

Laun hækkuðu um 1,6% á milli þriðja og fjórða ársfjórðungs síðasta árs. Laun á almennum vinnumarkaði hækkuðu um 1,9% frá fyrri ársfjórðungi og laun opinberra starfsmanna hækkuðu um 0,8% á sama tímabili. Þetta er meiri talsvert meiri hækkun en sést hefur undanfarna ársfjórðunga sem rekja má til kjarasamninga sem tóku gildi á tímabilinu.

Frá fyrri ársfjórðungi hækkuðu laun sérfræðinga minnst eða um 1,1%. Mest hækkuðu laun þjónustu-,sölu-, og afgreiðslufólks á sama tímabili eða um 2,7%. Raunlaun lækkuðu hinsvegar á sama tímabili en kaupmáttur launa dróst saman um tæplega 1% á fjórða ársfjórðungi síðasta árs frá fyrri fjórðungi sama árs.

Þá voru regluleg laun að jafnaði 3,2% hærri á fjórða ársfjórðungi síðasta árs en á sama ársfjórðungi árið á undan. Kaupmáttur launa rýrnaði um 5% á sama tímabili. Hefur kaupmáttur launa þá lækkað um tæplega 12% frá því að hann náði hámarki í síðustu uppsveiflu á fjórða ársfjórðungi 2007.

Atvinnuleysi á 4. ársfjórðungi síðasta árs var 6,7% samanborið við 4% atvinnuleysi á sama ársfjórðungi árið 2008 og 1,9% atvinnuleysi á sama tímabili 2007. Hagstofan mælir atvinnuleysi með nokkuð öðrum hætti en Vinnumálastofnun, og skýrir það hvers vegna atvinnuleysishlutfallið mælist talsvert lægra í vinnumarkaðskönnun Hagstofunnar en í mánaðarlegum tölum Vinnumálastofnunar yfir skráð atvinnuleysi.