NBA í nótt: Dallas stöðvaði sigurgöngu San Antonio

Það kom að því að San Antonio Spurs tapaði aftur leik í NBA-deildinni í körfubolta. Eftir tólf sigra í röð varð liðið að sætta sig við tap gegn Dallas í nótt, 103-94.

Dirk Nowitzky fór á kostum í leiknum í nótt og gerði gæfumuninn fyrir Dallas. Hann skoraði 26 stig í leiknum, tók átta fráköst og gaf fimm stoðsendingar. Hann nýtti tólf af fjórtán skotum sínum í leiknum, þar af bæði þriggja stiga skotin sín.

Shawn Marion og Tyson Chandler voru líka öflugir og skoruðu nítján stig hver.

San Antonio byrjaði betur og Manu Ginobili skorði margar glæsilegar körfur í fyrri hálfleik. En Dallas vann sig betur inn í leikinn í þeim síðari þar sem liðin skiptust á að vera með forystu.

En Dallas náði svo að síga fram úr á síðustu mínútum leiksins og reyndist Nowitzky drjúgur á lokasprettinum er Dallas skoraði fjórtán stig gegn aðeins tveimur frá San Antonio.

Ginobili skoraði alls 31 stig í leiknum, þar af sextán strax í fyrsta leikhluta. George Hill átti góða innkomu af bekknum og skoraði 21 stig.

Þetta var besta byrjun San Antonio í sögu félagsins en liðið er engu að síður enn með besta árangur allra liða í NBA-deildinni í dag - þrettán sigra og tvö töp.

Boston vann Toronto, 110-101. Kevin Garnett skoraði 26 stig og tók ellefu fráköst. Shaquille O'Neal bætti við sextán stigum og níu fráköstum.

Miami vann Philadelphia, 99-90. Dwyane Wade skoraði 23 stig og LeBron James 20 fyrir Miami sem hafði tapað þremur leikjum í röð fyrir þennan.

Utah vann LA Lakers, 102-96. Deron Williams skoraði 29 stig fyrir Utah sem lenti mest nítján stigum undir í fyrri hálfleik í nótt.

Denver vann Chicago, 98-97. Carmelo Anthony tryggði Denver sigurinn með flautukörfu í lok leiksins.

Orlando vann Cleveland, 111-100. Dwight Howard skoraði 23 stig og tók ellefu fráköst fyrir Orlando. Jameeer Nelson bætti við 20 stigum.

Oklahoma City vann Indiana, 110-106, í framlengdum leik. Russell Westbrook skoraði 43 stig fyrir Oklahoma City.

Charlotte vann Houston, 99-89. Gerald Wallace skoraði 21 stig og tók fjórtán fráköst fyrir Charlotte. Boris Diaw bætti við 20 stigum og tók tíu fráköst.

New Orleans vann Portland, 97-78. Willie Green skoraði nítján stig fyrir New Orlenas og Trevor Ariza átján.

Memphis vann Golden State, 116-111. Rudy Gay skoraði 25 stig fyrir Memphis og OJ Mayo 23.

Phoenix vann LA Clippers, 116-108. Jason Richardson skoraði 29 stig og Hakim Warrick 25.

Detroit vann Milwaukee, 103-89. Rodney Stuckey skoraði átján stig og var með sjö stoðsendingar. Richard Hamilton bætti við fimmtán stigum og níu stoðsendingum fyrir Detroit.