Ísland vann Færeyjar í landskeppni í sundi

Ísland vann Færeyjar með 98 stigum gegn 80 í Landskeppni í sundi sem fór fram í Laugardalslaug í gær. Þetta er annað árið í röð sem slík keppni er haldin en í fyrra sigruðu Færeyingar á sínum heimavelli. Sigur Íslands var aldrei í hættu og segja má að það eina sem skyggði á gleðina var að A sveit Íslands gerði ógilt í síðasta boðsundinu.

Ísland varð í fyrsta sæti í sex einstaklingsgreinum af tólf, vann bæði 4x50 metra fjórsund (boðsund) karla og kvenna en Færeyjar unnu 8x50 metra skriðsund (boðsund) þar sem blandað var í liðum konum og körlum.

Stigahæstu einstaklingarnir á mótinu voru þau Ragnheiður Ragnarsdóttir með 808 FINA stig fyrir 100 metra skriðsund og Jakob Jóhann Sveinsson með 816 stig fyrir 100 metra bringusund.

Íslenska liðið var skipað þeim Antoni Sveini Mckee, Ágústi Júlíussyni, Bryndísi Rún Hansen, Eygló Ósk Gústafsdóttur, Hrafni Traustasyni, Hrafnhildi Lúthersdóttur, Ingu Elínu Cryer, Ingibjörgu Kristínu Jónsdóttur, Jakobi Jóhanni Sveinssyni, Jóhönnu Gerðu Gústafsdóttur, Kareni Sif Vilhjálmsdóttur, Kolbeini Hrafnkelssyni, Njáli Þrastarsyni, Orra Frey Guðmundssyni, Ragnheiði Ragnarsdóttur og Sigurði Erni Ragnarssyni. Þjálfari íslenska liðsins var svo Jacky Pellerin.