Messi: Bað jólasveininn um sigur í Suður-Ameríkukeppninni 2011

Það hefur flest allt gengið upp hjá Argentínumanninum Lionel Messi í búningi Barcelona og nú dreymir hann um að fara vinna titla með argentínska landsliðinu. Messi var heima í Argentínu um jólin og bað jólasveininn um fyrsta titilinn með landsliðinu á næsta ári.

„Ég vil vinna minn fyrsta titil með argentínska landsliðinu á árinu 2011 svo að ég bað jólaveininn um sigur í Suður-Ameríkukeppninni," sagði Lionel Messi í viðtali við fjölmiðla þegar hann var staddur í heimbæ sínum Rosario.

Messi hefur verið gagnrýndur heima fyrir vegna slakrar frammistöðu sinnar með landsliðinu og sumir hafa farið svo langt að líta á hann sem Katalóníubúa þar sem að hann blómstri aðeins með Barcelona-liðinu. Messi færi langt með að útrýma þeim hugsuninum landa sinna gangi allt upp næsta sumar.

„Ég mun gera allt til þess að vinna og þetta er gjöf sem ég vil líka gefa öllum Argentínumönnum. Fólkið í mínu landi á það skilið að upplifa frábært ár," sagði Messi en Suður-Ameríkukeppnin fer einmitt fram í Argentínu næsta sumar. Keppnin verður spiluð á milli 1. og 24. júlí.