Daníel Einarsson semur við Akureyri

Daníel Einarsson mun í dag skrifa undir samning við Akureyri Handboltafélag. Daníel kemur frá Stjörnunni og mun hann gera eins árs samning við Akureyrarfélagið.

Daníel er örvhentur hornamaður sem skoraði 65 mörk í N1-deildinni fyrir Stjörnuna á síðasta tímabili.

Daníel hafði hug á að flytja norður og breyta til en Stjarnan féll úr deildinni í vor.

Akureyringar eru þar með orðnir vel settir með örvhenta menn í liði sínu því félagið samdi einnig við Bjarna Fritzson nýverið. Auk þess hefur liðið á að skipa einn efnilegasta örvhenta leikmann landsins, Geir Guðmundsson.