Ætlar bara að skoða sín mál í rólegheitunum eftir tímabilið

Árni Gautur Arason og félagar í íslenska landsliðinu mæta Liechtenstein í æfingaleik á Laugardalsvellinum í kvöld en leikurinn hefst klukkan 19.30. Hvorki Árni Gautur né Gunnleifur Gunnleifsson hafa fengið á sig mark í fjórum landsleikjum ársins til þess.

Árni Gautur verður á tímamótum í haust þegar samningur hans við Odd Grenland rennur út en hann fær ekki nýjan samning hjá norska liðinu. Árni Gautur er ekki mikið að hugsa um framtíð sína og ætlar að einbeita sér að því að standa sig vel með Odd Grenland og íslenska landsliðinu.

„Það er ekkert nýtt að frétta af mér og minni stöðu. Ég ætla bara að skoða málin í rólegheitunum og sjá hvaða möguleikar eru í boði. Ég fer ekkert í það fyrr en eftir tímabilið því ég er með samning fram að áramótum," segir Árni Gautur.

„Það skiptir mestu máli að klára þetta tímabil almennilega og sjá síðan hvaða möguleikar eru í boði. Það eru fleiri þættir sem spila inn í þetta eins og fjölskyldan. Ég veit ekki hvort ég geti endað á Íslandi en ég vil skoða allt hvort sem það er í Noregi eða utan Noregs. Það er ekkert þannig séð á borðinu," segir Árni Gautur.

Íslenska landsliðið hefur ekki fengið á sig mark í fjórum landsleikjum á árinu en Árni Gautur stóð í markinu í þeim fyrsta á móti Kýpur.

„Þetta er búið að vera að virka vel og við munum reyna að halda áfram á þessari braut. Það verður erfiður leikur á morgun (í dag) og mikilvægur undirbúningur fyrir leikina í haust," segir Árni Gautur.

Ísland tapaði illa fyrir Liechtenstein fyrir tæpum þremur árum í undankeppni EM en Árni Gautur er ekkert að hugsa um að hefna eitthvað fyrir þann leik.

„Við erum búnir að gleyma því hvernig fór gegn fyrir nokkrum árum og svöruðum fyrir það þegar við spiluðum við þá síðast," segir Árni en Ísland vann 2-0 sigur á Liechtenstein í æfingaleik í fyrra þar sem Árni stóð í markinu í fyrri hálfleiknum.

„Við horfum bara fram á við og reynum að nýta þetta sem best sem undirbúning fyrir þessa haustleiki. Við erum í hörku riðli og það er spenna í manni að þetta sé að fara í gang," sagði Árni að lokum.