Þóroddur Hjaltalín dæmir hjá Portúgölum á morgun

Þóroddur Hjaltalín mun dæma leik Portúgals og Makedóníu í undankeppni EM hjá U21 karla en leikurinn fer fram á Dr. Jorge Sampaio leikvanginum í Vila Nova de Gaia á morgun.

Þóroddi til aðstoðar verða þeir Ólafur Ingvar Guðfinnsson og Gunnar Sverrir Gunnarsson. Varadómari leiksins verður Erlendur Eiríksson.

Jóhannes Valgeirsson dæmdi vináttulandsleik á milli Danmerkur og Litháen hjá U21 karla á föstudaginn en Danir eru gestgjafar úrslitakeppni mótsins og leika því ekki í undankeppninni. Með Jóhannesi á leiknum voru þeir Jóhann Gunnar Guðmundsson og Áskell Gíslason.

Sigurður Hannesson verður síðan dómaraeftirlitsmaður UEFA á leik Svía og Dana í umspili um sæti á HM kvenna. Leikurinn fer fram í Gautaborg 11. september.