Valencia á toppinn á Spáni

Valencia kom sér á topp spænsku úrvalsdeildinarinnar með 2-0 sigri á Sporting Gijon í kvöld. Real Madrid gerði á sama tíma markalaust jafntefli við Levante.

Real datt niður í þriðja sæti deildarinnar þar sem að Barcelona vann 3-1 sigur á Athletic Bilbao.

Valencia er enn taplaust í deildinni og hefur fengið þrettán stig af fimmtán mögulegum. Mehmet Topal og Roberto Soldado skoruðu mörk liðsins í kvöld en það mætir næst Manchester United í Meistaradeild Evrópu á miðvikudagskvöldið.

Barcelona naut góðs af því í kvöld að Fernando Amorebieta, leikmaður Athletic, fékk að líta rauða spjaldið í fyrri hálfleik en staðan í leikhléi var engu að síður markalaus.

Þeir Seydou Keita, Xavi og Sergio Busquets skoruðu þó fyrir Börsunga í síðari hálfleik. David Villa, leikmaður Barcelona, fékk reyndar að líta rauða spjaldið undir lok leiksins.

Real virðist ganga illa að skora undir stjórn Jose Mourinho en liðið hefur skorað sex mörk í fyrstu fimm leikjum liðsins. Það er óneitanlega lítið, samanborið við að liðið skoraði 102 mörk allt síðasta tímabil.

„Það er ekki eðlilegt hvað þetta lið þarf mikið af marktækifærum til að skora," sagði Mourinho. „Ég hef vitanlega áhyggjur af því því maður verður að skora til að vinna leiki og við höfum þegar tapað nokkrum stigum."

„Gæði leikmanna er ekki vandmálið því þessir leikmenn eru vanir því að skora oft og mikið."

Barcelona mætir Rubin Kazan í Meistaradeild Evrópu í næstu viku og Real Madrid mætir Auxerre.