Markajafntefli hjá kvennaliðum Þór/KA og Vals í Boganum

Þór/KA og Valur gerðu 2-2 jafntefli í Lengjubikar kvenna í Boganum á Akureyri í gærkvöldi en bæði lið höfðu unnið fyrsta leik sinn í keppninni. Þór/KA vann 3-1 sigur á KR í fyrsta leik á sama tíma og Valur vann 4-0 sigur á Stjörnunni.

Dagný Brynjarsdóttir tryggði Val jafnteflið strax á 37. mínútu en öll mörk leiksins komu í fyrri hálfleik. Rakel Hönnudóttir og Danka Podovac komu Þór/KA tvisvar yfir í leiknum en Björk Gunnarsdóttir jafnaði leikinn í 1-1.

Rakel Hönnudóttir komst næst því að tryggja heimastúlkum sigurinn þegar hún átti skot í slánna í seinni hálfleik.

Sigurður Ragnar Eyjólfsson kvennalandsliðsþjálfari var meðal áhorfenda á leiknum.

Upplýsingar um leikinn eru fengnar af vefsíðunni fotbolti.net.