Íslensku U-17 stelpurnar í efsta styrkleikaflokki

Íslenska U-17 landslið stúlkna verður í efsta styrkleikaflokki þegar dregið verður í milliriðla í undankeppni EM 2011.

Íslenska liðið náði frábærum árangri í riðlakeppninni þar sem stúlkurnar unnu alla sína þrjá leiki með miklum mun.

Liðið vann lið Ítalíu, Litháen og Búlgaríu og skoraði í þeim leikjum samtals 29 mörk en fékk aðeins eitt á sig.

Sá árangur fleytti liðinu í efsta styrkleikaflokk fyrir milliriðlakeppnina en dregið verður þann 16. nóvember næstkomandi.

Ísland er í efsta styrkleikaflokki ásamt Þýskalandi, Spáni og Sviss. Þjóðverjar þurftu ekki að taka þátt í undanriðlinum en Spánverjar eru ríkjandi meistarar í þessum aldursflokki.

Sextán lið keppa í fjórum milliriðlum. Efsta liðið í hverjum milliriðli kemst í lokakeppnina sem fer fram í Nyon í Sviss á næsta ári.

Þar sem aðeins fjögur lið komast í lokakeppnina fara liðin beint í undanúrslit og sigurvegarar þeirra leikja í sjálfan úrslitaleikinn.

Styrkleikaflokkarnir:

1. flokkur: Þýskaland, Ísland, Spánn, Sviss.

2. flokkur: Tékkland, Danmörk, Svíþjóð, Skotland.

3. flokkur: Belgía, Finnland, England, Wales.

4. flokkur: Rússland, Pólland, Frakkland, Ítalía.

Þá verður einnig dregið í undanriðla fyrir EM 2012 í þessum aldursflokki á sama tíma. Þar er Ísland í öðrum styrkleikaflokki af þremur.