Jose Mourinho er búinn að gefast upp á Gerrard og Carvalho

Jose Mourinho, þjálfari Real Madrid, er búinn að gefa upp vonina um að fá þá Steven Gerrard og Ricardo Carvalho til sín á Bernebeu en leikmennirnir tveir voru orðaðir við Madridar-liðið í allt sumar.

„Steven Gerrard er hluti af sögu Liverpool og á heima í klúbbnum. Hann er of mikilvægur fyrir þá og þetta er samskonar dæmi og þegar ég reyndi að frá Frank Lampard frá Inter," sagði Jose Mourinho á blaðamannafundi eftir 3-2 sigur Real Madrid á LA Galaxy í síðasta æfingaleik liðsins í Ameríkuförinni.

„Ricardo er góður leikmaður en hann er orðinn það gamall að það er ekki hægt að byggja upp framtíðarlið með honum. Ricardo er leikmaður sem getur hjálpað þér í dag enda frábær atvinnumaður með gott einkalíf. Hann á í engum vandræðum með að spila á hæsta stigi þótt að hann sé orðinn 32 ára," sagði Mourinho síðan um Ricardo Carvalho.