NBA: Líflína hjá Orlando Magic

Strákarnir í Orlando Magic björguðu andlitinu í úrslitarimmunni við Boston Celtics með því að klóra í bakkann í nótt. Eftir 96-92 sigur í framlengdum leik er staðan í einvíginu 3-1 fyrir Boston. Leikurinn var skemmtilegur áhorfs þar sem bæði lið gerðu mörg mistök og sýndu frábær tilþrif. Dwight Howard skoraði 32 stig fyrir Orlando og tók 16 fráköst á meðan Jameer Nelson sallaði niður 23 stigum og gaf 9 stoðsendingar. Paul Pierce skoraði 32 stig fyrir Boston og tók 9 fráköst og Ray Allen skoraði 22. Leikurinn var jafn nánast allan tímann. Orlando var 32-26 yfir eftir fyrsta leikhluta og Boston var svo fjórum stigum yfir í hálfleik, 47-51. Einu stigi munaði á liðunum fyrir síðasta leikhlutann sem var æsispennandi. Pierce jafnaði metin í 86-86 þegar rúm mínúta var eftir þegar hann keyrði að körfunni, skoraði og fékk víti að auki. Rondo stal svo boltanum fyrir Boston en hvorugt liðið náði að skora meira í leikhlutanum, Pierce og Nelson klikkuðu báðir á skotum. Í framlengingunni hafði Orlando svo betur. Það tók reyndar helming hennar til að fá fyrstu stigin þegar Nelson skoraði þriggja stiga körfu, og hann gerði svo aðra í næstu sókn eftir að Boston hafði mistekist að skora. Tvær risakörfur hjá kappanum. Allen svaraði með tveimur þriggja stiga körfum en í millitíðinni skoraði Howard. 94-92 og rúm mínúta eftir. Howard skoraði aftur, 96-92, og Boston skoraði ekki meira þrátt fyrir nokkur skot. Orlando gerði vel í að klára leikinn en þarf nánast kraftaverk til að gera seríuna spennandi. Þó er aldrei að vita ef liðið vinnur fimmta leikinn, sem ætti að vera æsispennandi líka.