Allegri: Synd að klára ekki leikinn

Massimiliano Allegri, þjálfari AC Milan, var hundsvekktur að hafa ekki fengið öll stigin gegn Real Madrid í kvöld. Filippo Inzaghi fór langleiðina með að tryggja Milan öll stigin en Pedro Leon jafnaði í uppbótartíma.

"Auðvitað er ég svekktur en úrslitin eru sanngjörn miðað við færin sem Real fékk í leiknum. Við fengum samt ágæt færi líka," sagði Allegri.

"Síðari hálfleikur var betri hjá okkur en við vorum samt í vandræðum. Það var frábært að koma til baka og við náðum að sýna styrk okkar. Þetta var mun betri leikur en á Spáni.

"Ég er ánægður með okkar leik því þetta eru mikilvæg úrslit. Það var samt synd að klára ekki leikinn."