Sveinbjörn Pétursson aftur til Akureyrar?

Markmaðurinn Sveinbjörn Pétursson gæti verið á leiðinni aftur til Akureyrar. Norðlendingurinn hefur spilað með HK undanfarin ár en hefur hug á því að spila með sínu gamla félagi á næsta tímabili.

Viðræður eru í gangi á milli Akureyri og HK um kaup á Sveinbirni sem HK fékk frítt frá Akureyri á sínum tíma.

Akureyri hefur þegar boðið í Sveinbjörn en HK neitaði því tilboði.

"Við viljum ekki missa hann enda einn af bestu markmönnum deildarinnar," sagði Alexander Arnarson, formaður handknattleiksdeildar HK sem vissi ekki hvort annað tilboð væri á leiðinni að norðan.

Akureyringar hafa fullan hug á að klára málið en Sveinbjörn er með samning við HK næstu þrjú árin.

Hörður Flóki Ólafsson hefur lagt handboltaskóna á hilluna og þá er óvíst hvort Hafþór Einarsson spili með Akureyri á komandi tímabili.