Ekki víst að Beckham byrji gegn United á San Siro

Brasilíumaðurinn Leonardo, þjálfari AC Milan, segist ekki geta lofað David Beckham sæti í byrjunarliði Milan er það mætir Man. Utd í Meistaradeildinni á San Siro á þriðjudag.

Beckham var í byrjunarliði Milan fyrstu fimm leikina eftir að hann kom frá Bandaríkjunum en hefur mátt sætta sig við að byrja á bekknum í síðustu tveimur leikjum.

„Við vitum að þetta er mjög sérstakur leikur fyrir David. Það er mjög sérstakt að spila í Meistaradeildinni gegn „sínu" liði. Við skulum orða það þannig. Við munum þurfa að greina ýmislegt fyrir leikinn og ákveða hvað hentar hverju sinni," sagði Leonardo.

„Við getum spilað með Beckham í nánast hvaða stöðu sem er. Hann er gáfaður leikmaður og taktískt séð er hann fullkominn. Það er aldrei vandamál að koma honum fyrir. Hann hefur staðið sig vel."