Ronaldo: Er í stórskotlegu formi

Cristiano Ronaldo segir að hann sé í frábæru formi þessa dagana enda hefur hann skorað tíu mörk í síðustu fjórum deildarleikjum sínum.

Real Madrid fór rólega af stað í spænsku úrvalsdeildinni í haust hvað markaskorun varðar en liðið fór á kostum í október. Liðið vann alla fjóra leiki sína og skoraði í þeim nítján mörk.

Þar af skoraði Ronaldo tíu, sem fyrr segir. „Ég er í stórkostlegu formi og á ótrúlegu skriði. Ég er ánægður með allt, bæði mörkin og sigrana," sagði Ronaldo eftir að hann skoraði tvö mörk í 3-1 sigri Real gegn Hercules á laugardaginn.

Ronaldo skoraði alls tólf mörk í októbermánuði í aðeins sex leikjum en auk deildarleikjanna skoraði hann tvö í jafn mörgum með landsliði Portúgals, þar af annað gegn Íslandi á Laugardalsvellinum.