Birkir Ívar: Gekk ágætlega miðað við aldur og fyrri störf

„Það gekk bara ágætlega í dag miðað við aldur og fyrri störf," sagði maður leiks Gróttu og Hauka, Birkir Ívar Guðmundsson.

Birkir Ívar átti frábæran leik og varði tuttugu og þrjú skot en hann var liði sínu afar mikilvægur í dag.

„Ég var sáttur við minn leik og þetta gekk bara fínt. Ég er fyrst og fremst sáttur við öll stigin hér á erfiðum útivelli. Þeir börðust eins og ljón og létu okkur svo sannarlega hafa fyrir þessu," sagði Birkir.

Hann vill meina að Gróttuliðið sé með hörkuhóp og að það sé aldrei auðvelt að mæta þeim.

„Mér fannst við ekki vera spila okkar besta sóknarleik en það verður ekkert tekið af Gróttu að þeir eru með hörkulið og mjög góðan mannskap. Ég átti alls ekki von á auðveldum leik hér í dag," sagði Birkir Ívar eftir leikinn í dag.