Auður Capital tapaði 88 milljónum í fyrra

Þetta kemur fram í tilkynningu um rekstur síðasta árs. Þar segir að nýliðið rekstrarár einkenndist af uppbyggingu og fjárfestingu í innviðum og mannauði. Umsvif fyrirtækisins jukust til muna en á árinu hóf Auður vörslu séreignarsparnaðar og starfsemi fyrirtækjaráðgjafar var efld til muna. Starfsmannafjöldi tvöfaldaðist á árinu 2009, starfsmenn voru 16 í byrjun árs en 32 við árslok.

„Við ákváðum að fjárfesta í framtíðinni því við vitum að öll él styttir upp um síðir", segir Kristín Pétursdóttir, forstjóri Auðar Capital. „Við erum sannfærð um að fjármálafyrirtæki byggt á heilbrigðri hugmyndafræði eigi mikil tækifæri á markaði þar sem traust og trúverðugleiki skiptir sköpum.

Mikil fjölgun viðskiptavina í séreignarsparnaði og eignastýringu undirstrikar að eftirspurn eftir okkar nálgun er mikil. Verkefnastaða fyrirtækjaráðgjafar er mjög góð og þó að fjárfestingar hafi gengið hægar en við hefðum óskað þá bindum við vonir við að það sé að losna um fjárfestingarkosti í kjölfar endurskipulagningar bankanna."

Á aðalfundinum var stjórn félagsins kjörin. Stjórnina skipa: Halla Tómasdóttir, stjórnarformaður, Guðbjörg Edda Eggertsdóttir, Vilhjálmur Þorsteinsson, Kristín Edwald og David Adams.