Silvestre: Bremen getur unnið öll lið

Franski varnarmaðurinn Mikael Silvestre, sem nú leikur með Werder Bremen, er bjartsýnn fyrir leik liðsins gegn Tottenham í Meistaradeildinni í kvöld þó svo hann sé ekki búinn að vera lengi hjá liðinu.

"Ég er bara búinn að æfa nokkrum sinnum með liðinu. Við erum samt atvinnumenn og verðum að tjá okkur. Það tala allir ensku í Þýskalandi þannig að þetta er samt ekkert mál," sagði Silvestre sem er greinilega ekki búinn að vera lengi í Þýskalandi fyrst hann heldur að allir tali ensku þar.

"Ég hef átt nokkra góða leiki gegn Tottenham. Liðið hefur mikið bætt sig og er núna eitt besta lið deildarinnar. Liðið á skilið að vera í Meistaradeildinni."

Silvestre gerir ráð fyrir hörkuleik í kvöld.

"Það eru engir auðveldir leikir í Meistaradeildinni en við getum unnið öll lið. Það bera líka öll lið virðingu fyrir Werder Bremen."