Schumacher ámægður með nýja leikfangið

Michael Schumacher er kampakátur að vera kominn aftur í Formúlu 1,, en hann ók með Mercedes í gær á æfingum í Valencia. Hann hóf ferilinn árið 1991, en tók sér þriggja ára hvíld og kom óvænt aftur í slaginn í ár. Hann er með þriggja ára samning við Mercedes liðið sem er stýrt af vini hans Ross Brawn.

"Þegar ég byrjaði í Formúlu 1 þá var mikið sjokk að keyra fyrsta hringinn, spenna í öðrum hring og svo þeim næstu. Ég upplifði það sama á ný. Mér líður eins og strák með leikfang í höndunum sem er að skemmta sér", sagði Schumacher við blaðamenn.

Hann sagði líka skrítið að sjá Ferrari bílanna bruna brautina, án þess að hann væri að stýra fákunum ítölsku.

"Það er skrítið að sjá gamla bílinn minn og vera ekki í honum, en gott að sjá bróðir minn (Massa) og hitta vini mína hjá Ferrari þessa vikuna. Ég tel að við höfum staðið okkur vel á æfingunnni og við fórum meira en 80 hringi í heildina. Mér líður vel og hef undirbúið mig afar vel", sagði Schumacher.