NBA í nótt: Sjöundi sigur Chicago í röð

Chicago vann sinn sjöunda sigur í röð, Paul Pierce stöðvaði sigurgöngu New York og LeBron James var aftur heitur gegn sínum gömlu félögum í Cleveland er Miami vann sinn tíunda sigur í röð. Það var nóg um að vera í NBA-deildinni í körfubolta í nótt.

Chicago vann Toronto, 110-93, þar sem Carlos Boozer fór mikinn og skoraði 34 stig og tók tólf fráköst.

En það var tilkynnt eftir leikinn að Joakim Noah muni gengast undir aðgerð á hægri þumalputta og verði frá næstu 8-10 vikurnar. Noah skoraði ellefu stig og tók ellefu fráköst í leiknum í nótt en hann meiddist í leik gegn Sacramento í lok síðasta mánaðar.

„Hann er mikil hetja fyrir að hafa spilað meiddur í svo langan tíma," sagði Boozer eftir leikinn. „Ég tek hatt minn ofan fyrir honum."

Luol Deng bætti við nítján stigum fyrir Chicago og Derrick Rose gaf alls ellefu stoðsendingar í leiknum. Sigur Chicago var öruggur en liðið var mest með 29 stiga forystu í leiknum.

Leandro Barbosa var með 21 stig fyrir Toronto sem hefur nú tapað sex af síðustu sjö leikjum sínum í deildinni.

Boston vann New York, 118-116, þar sem Paul Pierce var einu sinni sem oftar hetja Boston en hann skoraði sigurkörfu leiksins þegar 0,4 sekúndur voru til leiksloka.

Amare Stoudemire náði reyndar að setja niður þrist eftir þetta en dómarar úrskuðuð að karfan hafi verið ógild þar sem að leiktíminn var útrunninn.

New York hafði unnið átta leiki í röð en máttu sætta sig við súrt tap í nótt. Pierce skoraði 32 stig fyrir Boston sem var undir stærstan hluta fjórða leikhluta.

LA Lakers vann Indiana, 109-94. Kobe Bryant skoraði 31 stig, þar af 25 í síðari hálfleik.

Dallas vann Portland, 103-98. Caron Butler skoraði 23 stig og Dirk Nowitzky 21, þar af tólf í fjórða leikhluta.

Miami vann Cleveland, 101-95, þar sem að Dwyane Wade skoraði 28 stig. LeBron James skoraði 21 stig og tók þrettán fráköst gegn sínu gamla félagi. Þetta var tíundi sigur Miami í röð.

Philadelphia vann LA Clippers, 105-91. Jrue Holiday skoraði 24 stig og Andre Iguodala 20 fyrir Philadelphia.

Memphis vann Charlotte, 113-80. OJ Mayo skoraði 24 stig og Rudy Gay 23 fyrir Memphis.

New Orleans vann Sacramento, 94-91. Chris Paul skoraði 22 stig og gaf ellefu stoðsendingar fyrir New Orleans sem vann eftir að hafa verið 23 stigum undir í leiknum.

Oklahoma City vann Houston, 117-105. Kevin Durant skoraði 32 stig og Thabo Sefolosha bætti við fimmtán stigum og tók þar að auki níu fráköst.

San Antonio vann Milwaukee, 92-90. Manu Ginobili tryggði San Antonio sigurinn með flautukörfu.