Eignir bankanna aukast og skuldir minnka

Heildareignir innlánsstofnana námu 2.787 milljarða kr. í lok janúar 2011 og hækkuðu um 2,8 milljarða kr. frá fyrra mánuði, þar af hækkuðu innlendar eignir um tæpa 1,6 milljarða kr. en erlendar eignir um tæpa 1,3 milljarða kr.

Þetta kemur fram í hagtölum Seðlabankans. Þar segir að heildarskuldir innlánsstofnana námu 2.336 milljarða kr. og lækkuðu um 2,4 milljarða kr. Innlendar skuldir hækkuðu um 7,2 milljarða kr. en erlendar skuldir lækkuðu um 9,6 milljarða kr.

Eigið fé innlánsstofnana nam 451 milljarði kr. í lok janúar og hækkaði um 5,3 milljarða kr. frá fyrra mánuði.

Í hagtölunum segir að útlán Arion banka hf., Íslandsbanka hf. og NBI hf. eru í þessum tölum metin á kaupvirði þ.e. því virði sem þessir aðilar keyptu útlánasafnið á af Kaupþing banka hf. , Glitni hf. og Landsbanka Íslands hf. Kaupvirðið er það virði sem vænt er að muni innheimtast af útlánunum. Virði útlánasafnsins endurspeglar því ekki skuldastöðu viðskiptavina.

Lánasöfnin eru endurmetin með reglubundnum hætti, sem getur leitt til hækkunar eða lækkunar á virði einstakra lána. Breytingar milli mánaða/ársfjórðunga á útlánasafni þessara aðila geta því stafað af endurmati á virði lána eða af raunverulegum lánahreyfingum.