Ólögmæt riftun vegna greiðsluaðlögunar

Samtök lánþega benda á, að með riftunum á bílasamningum skuldara sem eru í umsóknarferli um greiðsluaðlögun, þá eru fjármögnunarfyrirtækin að fara fram á að skuldari fremji lögbrot með því að mismuna kröfuhöfum á síðari stigum.

Þetta kemur fram í tilkynningu frá samtökunum. Þar segir að í mörgum tilfellum er um að ræða samninga þar sem ljóst er að eignarhlutur skuldara í bifreið er umtalsverður. Í slíkum tilfellum væri verið að mismuna kröfuhöfum.

Jafnframt eru fjármögnunarfyrirtækin að ganga gegn almennum rétti neytenda með því að svipta þá eign sinni án þess að fullnaðaruppgjör komi á móti. Er í því tilefni bent á hæstaréttardóma sem segja kaupleigusamninga vera lánasamninga og því er lánþegi hinn rétti eigandi bifreiðar og fjármálafyrirtæki óheimilt að ráðstafa þeirri eign.

Samtök lánþega krefjast þess að fjármálafyrirtækin láti þegar af þessari ólöglegu háttsemi.

Er þess og krafist að fjármálafyrirtækin taki upp viðræður við lánþega um útfærslu á þeim málum er svo er háttað um og hagi samningsriftunum með eftirfarandi hætti:

Telji fjármögnunarfyrirtæki nauðsynlegt að rifta lánasamning vegna umsóknar skuldara um greiðsluaðlögun þá skal slíkt gert í samráði við skuldara.

Skuldara skal gefinn kostur á að mæta með bifreið í ástandsskoðun á viðurkenndu verkstæði hvar verðmæti bifreiðar er metið. Skal slíkt mat fara fram á kostnað fjármögnunarfyrirtækis, enda er krafa um riftun frá þeim komin.

Eftir að mat hefur verið lagt á bifreið, skal fara fram uppgjör.

Skal í þeim tilvikum þar sem andvirði bifreiðar er hærra en eftirstöðvar skuldar, endurgreiða skuldara þá fjárhæð með eingreiðslu um leið og bifreið er afhent. Sé um að ræða mismun fjármögnunarfyrirtæki í hag, þá skal fjármögnunarfyrirtæki við móttöku bifreiðar lýsa þeirri fjárhæð sem samningskröfu á hendur skuldara og verður sú krafa þá metin til jafns við aðrar kröfur í bú skuldara þegar greiðsluaðlögun kemur til afgreiðslu hjá embætti Umboðsmanns skuldara, að því er segir í tilkynngunni.