Icelandair tryggt fyrir tjóni vegna brotlendingarinnar

Icelandair Group er að fullu tryggt fyrir öllu tjóni sem flugfélagið verður fyrir vegna brotlendingar Dash 8 vélarinnar á Grænlandi í síðustu viku, nema tjóni vegna tekjumissis sem leiðir af því að missa eina vél úr rekstri leiðakerfi Flugfélags Íslands næstu vikurnar.

Í tilkynningu frá Icelandair til Kauphallarinnar kemur fram að ekki liggi fyrir hve mikið tjónið verði en það muni hafa óveruleg áhrif á rekstur Icelandair Group hf. Skemmdir urðu á skrokki vélarinnar og hreyflum og má gera ráð fyrir að þær séu töluverðar.