Veruleg lækkun á eignum ýmissa lánafyrirtækja

Eignir ýmissa lánafyrirtækja námu tæplega 1.094 milljörðum kr. í lok janúar og lækkuðu um 27 milljarða kr. á milli mánaða.

Þetta kemur fram í hagstölum Seðlabankans. Innstæður í Seðlabankanum lækkuðu um rúma 3,2 milljarða kr. og námu tæpum 38 milljarða kr. Kröfur á lánastofnanir lækkuðu um 4 milljarða kr og námu 81 milljarða kr. Útlán og eignaleigusamningar námu 937,7 milljörðum kr. og lækkuðu um 21 milljarð kr. á milli mánaða.

Frá og með janúar 2011 eru niðurfærslur sýndar sérstaklega sem sér liður undir útlánum og eignarleigusamningum og námu niðurfærslurnar rúmum 86 milljörðum kr. í janúar. Undirliðir útlána og eignarleigusamningar eru brúttó stærðir frá þeim tíma. Eigið fé ýmissa lánafyrirtækja í janúar er neikvætt og má það rekja til þess að ekki er búið að ganga frá endurfjármögnun á Íbúðalánasjóði.

Nýjustu gögn eru bráðabirgðagögn sem kunna að verða uppfærð eftir því sem nákvæmara uppgjör liggur fyrir. Virði útlána og eignaleigusamninga er óljóst í kjölfar dóms Hæstaréttar. Hagtölur ýmissa lánafyrirtækja endurspegla einungis starfandi lánafyrirtæki.

Til ýmissa lánafyrirtækja teljast Íbúðalánasjóður, fjárfestingarbankar, eignarleigur, greiðslukortafyrirtæki og fjárfestingarlánasjóðir.