35 stjórnarmenn hæfir, 12 hæfir í annarri tilraun, einn óhæfur

Ráðgjafarnefnd Fjármálaeftirlitsins um hæfi stjórnarmanna hefur nú metið 47 stjórnarmenn fjármálafyrirtækja og vátryggingafélaga, þar af átta úr stjórnum eignarhaldsfélaga. Niðurstaðan var sú að þekking, skilningur og viðhorf stjórnarmannanna varðandi helstu efni sem tengjast verksviði þeirra var fullnægjandi í 35 tilvikum en ófullnægjandi í 12 tilvikum.

Af þeim tólf sem reyndust ekki hafa viðunandi hæfi hafa átta mætt í endurtekið mat og stóðust þeir það allir nema einn. Þá hefur það gerst í níu tilvikum að stjórnarmenn hafa sagt sig úr stjórn og því ekki komið í hæfismat hjá Fjármálaeftirlitinu.

Mat ráðgjafarnefndarinnar er byggt á ítarlegu viðtali við stjórnarmenn þar sem farið er yfir þekkingu, skilning og viðhorf þeirra varðandi helstu efni sem tengjast verksviði þeirra.

Könnuð var meðal annars þekking á starfsemi fjármálafyrirtækja/vátryggingafélaga almennt og starfsemi þess fyrirtækis sem í hlut á sérstaklega. Enn fremur var spurt um hvert væri hlutverk, ábyrgð og helstu verkefni stjórnar og einstakra stjórnarmanna í fjármálafyrirtæki. Þá er lagt mat á sjálfstæði, dómgreind og viðhorf viðkomandi.

Ráðgjafanefnd um hæfi stjórnarmanna er skipuð þeim Jóni Sigurðssyni, rekstrarhagfræðingi, sem er formaður, Einari Guðbjartssyni, dósent hjá viðskiptafræðideild Háskóla Íslands og Rúnari Guðmundssyni, sviðsstjóra hjá Fjármálaeftirlitinu.