Jósef, Eiður Aron og Guðmundur Reynir fara ekki til Englands

Eyjólfur Sverrisson, þjálfari 21 árs landsliðsins, þurfti að gera breytingar á hópnum sínum fyrir vináttulandsleikinn gegn Englandi á mánudaginn en íslenska liðið tapaði 2-3 á móti Úkraínu í gærkvöldi.

Jósef Kristinn Jósefsson, Eiður Aron Sigurbjörnsson og Guðmundur Reynir Gunnarsson eru allir meiddir og fara því ekki til Englands en Eyjólfur hefur hinsvegar bætt Hirti Loga Valgarðssyni inn í hópinn.

Möguleiki er á því að nokkrir leikmenn sem eru nú með A landsliðinu á Kýpur en eru gjaldgengir í U21 liðið, muni bætast í hópinn fyrir leikinn gegn Englandi.  Það mun þá koma í ljós eftir leik Kýpurs og Íslands í undankeppni EM á morgun.