HS Veitur með 321 milljón í hagnað - greiða niður skuldir umfram lánsskilmála

HS Veitur hf (gamla Hitaveita Suðurnesja) sem er að 66,7% hluta í eigu. Reykjanesbæjar, skilaði 321 milljón króna hagnaði á árinu 2010 að því er fram kemur í ársreikningi. Hagnaður fyrir fjármagnsliði og afskriftir nam 920 milljónum króna og rekstrartekjur námu 4,2 milljörðum kr.

Í tilkynningu frá félaginu segir að á aðalfundi sem haldinn var í Stapa í Reykjanesbæ fimmtudaginn 24. mars hafi komið fram í máli Árna Sigfússonar stjórnarformanns að í ljósi sterkrar lausafjárstöðu hefði stjórn félagsins  ákveðið að greiða niður skuldir félagsins, umfram lánaskilmála, að upphæð 900 milljónir króna og lækka þannig heildarskuldir um 15%. Eigið fé HS Veitna hf nemur 8,7 milljörðum króna og eiginfjárhlutfall er 53%.

HS Veitur hf eiga kaldavatnslindir í Svartsengi og selja heitt og kalt vatn til allra heimila og fyrirtækja á Suðurnesjum og í Vestmannaeyjum. Auk þess sér fyrirtækið um dreifingu á raforku á Suðurnesjum, í Hafnarfirði, Álftanesi, Árborg og Vestmannaeyjum og hluta Garðabæjar.

Auk Reykjanesbæjar á Orkuveitan 16,6% hlut í fyrirtækinu og Hafnarfjörður 15,4%.

Á aðalfundinum var ný stjórn kjörin en í henni sitja. Frá Reykjanesbæ:

Böðvar Jónsson (formaður), Árni Sigfússon (varaformaður), Magnea Guðmundsdóttir (ritari), Guðný Kristjánsdóttir og Friðjón Einarsson.

Frá Hafnarfirði: Eyjólfur Sæmundsson.

Frá Orkuveitu Reykjavíkur: Páll Erland.