Netveiði hefst aftur í Hvítá og Ölfusá

Allt virðist stefna í að laxveiðar í net hefjist aftur af fullum krafti á vatnasvæði Hvítár og Ölfusár í Árnessýslu á næsta ári og að þá dragi úr stangveiði á svæðinu.

Næsta laxveiðitímabil verður að líkindum hið síðasta sem Stangveiðifélag Reykjavíkur greiðir landeigendum við árnar fyrir að leggja ekki net fyrir lax. Samningur félagsins við landeigendur um að leigja af þeim netaréttinn rennur út í haust og verður líklega ekki endurnýjaður, að því er fram kemur á vef Stangveiðifélagsins.

Þar segir ennfremur að Stangveiðifélagði hafi kostað tugum milljóna til þessa verkefnis og að stangveiði í Soginu og Stóru Laxá hafi aukist verulega í kjölfarið, en líklegt sé að verð á stangveiðileyfum muni lækka í kjölfarið, þar sem verulegur hluti laxins verði veiddur í net.

Í þessu samhengi er bent á að nú séu 20 ár frá því að netaleiga hófst á vatnasvæði Hvítár í Borgarfirði , sem skilað hafi stóraukinni laxveiði , ekki síst í bergvatnsánum í Borgarfirði. Að sama skapi hafi arðurinn af stangveiðinni aukist til mikilla muna á svæðinu.