Framleiðsluvísitala hækkaði um 2,7%

Vísitala framleiðsluverðs í febrúar 2011 var 207,5 stig og hækkaði um 2,7% frá janúar 2011, samkvæmt tölum frá Hagstofunni. Vísitala framleiðsluverðs fyrir sjávarafurðir var 238,5 stig, sem er hækkun um 2,4% frá fyrri mánuði og vísitala fyrir stóriðju var 255,8 stig, hækkaði um 3,4%. Vísitalan fyrir matvæli hækkaði um 1,0% og vísitala fyrir annan iðnað hækkaði um 2,9%.

Vísitala framleiðsluverðs fyrir vörur sem framleiddar voru og seldar innanlands hækkaði um 1,2% milli mánaða en vísitala fyrir útfluttar afurðir hækkaði um 3,1%.

Miðað við febrúar 2010 hefur vísitala framleiðsluverðs hækkað um 2,7% en verðvísitala sjávarafurða um 4,7%. Á sama tíma hefur verð á afurðum stóriðju hækkað um 1,5% en matvælaverð hefur hækkað um 3,3%.