Danske Bank kynnir greiningu á íslensku efnahagslíf

Lars Christensen, forstöðumaður greiningardeildar Danske Bank, mun næstkomandi þriðjudag, þann 12. apríl, kynna nýja greiningu bankans á íslensku efnahagslífi.

Í tilkynningu segir að greiningin verður fyrst kynnt á fundi VÍB, eignastýringaþjónustu Íslandsbanka, en hún verður gefin út sama dag og fundurinn er haldinn.  Þetta er í fyrsta sinn í fjögur ár sem Danske Bank vinnur greiningu á Íslensku efnahagslífi. Greining Danske Bank frá árinu 2006, „Iceland, Geyser crisis“  varaði við slæmum horfum hér á landi en hún vakti mikla athygli og hörð viðbrögð hér á landi.

Fundurinn hefst klukkan 8:30 þann 12. apríl og er fyrir viðskiptavini VÍB og boðsgesti. Mögulegt verður þó að horfa á fundinn í beinni útsendingu á vefsíðu VÍB, www.vib.is. Fundarstjóri er Ársæll Valfells, lektor við Háskóla Íslands.

„Það er mjög ánægjulegt að Lars Christensen hafi þegið boð VÍB um að fjalla um stöðu og horfur í íslensku efnahagslífi.  Eitt af hlutverkum VÍB er að stuðla að faglegri umræðu og skoðanaskiptum um fjárfestingar, viðskipti og efnahagsmál,“ segir Stefán Sigurðsson, framkvæmdastjóri eignastýringarsviðs Íslandsbanka.

„Hörð viðbrögð við skýrslu Danske Bank á sínum tíma ættu einmitt að kenna okkur Íslendingum gildi málefnalegra og faglegra skoðanaskipta. Það verður sérlega áhugavert að heyra núverandi skoðun Danske Bank á möguleikum Íslendinga til endurreisnar.”