Forsetinn hraunar yfir matsfyrirtækið Moody´s

Ólafur Ragnar Grímsson forseti Íslands notaði tækifærið í viðtali við sjónvarpsstöð Bloomberg fréttaveitunnar til að hrauna yfir matsfyrirtækið Moody´s. Hann sagði frammistöðu Moody´s í aðdraganda hrunsins hafa verið ömurlega þegar fyrirtækið gaf íslensku bönkunum einkunnina AAA skömmu fyrir fall þeirra.

Þetta kom fram í svari forsetans við spurningunni um hvort hann hefði ekki áhyggjur af því að Moody´s myndi setja lánshæfi Íslands í ruslflokk. Forsetinn segist ekki hafa neinar áhyggjur af því. Hann telur að í stað þess að einblína á úrslitin í Icesave kosningunum ætti Moody´s að beina sjónum sínum að því að mörg erlend stórfyrirtæki ætli að fjárfesta á Íslandi.

Í sambandi við erlendar fjárfestingar og áhuga alþjóðlegra fjárfesta á Íslandi sagði forsetinn m.a. að Rio Tinto ætlaði að fjárfesta fyrir 5 milljarða dollara í endurnýjun á álveri sínu. Hér skal tekið fram að sú framkvæmd er upp á um 60 milljarða króna.

Þá sagðist forsetinn engar áhyggjur hafa af því að aðildarviðræðunum við ESB verði slitið. Þvert á móti héldu þær viðræður áfram þegar Bretar og Hollendingar áttuðu sig á því að þeir fengju 9 milljarða dollara, um 1.000 milljarða kr., borgaðar úr þrotabúi Landsbankans. Forsetinn segir að þær greiðslur hefjist strax næsta sumar þegar stórar summur verða greiddar úr búinu til Breta og Hollendinga.