Delta Air stóreykur valkosti í fragtflugi

Með tilkomu áætlunarflugs Delta Air Lines til Keflavíkur frá Kennedyflugvelli í New York í sumar aukast talsvert valkostir inn- og útflutningsfyrirtækja hér á landi vegna víðtæks áætlunarkerfis flugfélagsins í Norður-Ameríku og öðrum heimsálfum.

Þetta segir í tilkynningu frá félaginu. Vöruflutningar Delta til Kennedyflugvallar margfalda möguleika vöruflytjenda og framleiðenda sjávarafurða til að flytja vörur sínar með auknum hraða og öryggi um öflugt dreifikerfi Delta beint á markað í stórborgum Bandaríkjanna og Kanada.

Áætlunarflug Delta hefst 2. júní nk. og verður flogið fimm daga vikunnar að undanskildum þriðjudögum og miðvikudögum. Frá Íslandi flytja þotur Delta t.d. ferskar sjávarafurðir, eldislax og -silung og aðrar útflutningsvörur til Bandaríkjanna og víðar.

Hingað mun Delta flytja m.a. neytendavörur, véla- og varahluti, ferska ávexti, grænmeti og margt fleira. Umboðs- og vörumiðlun fyrir flugfrakt Delta er hjá Bláfugli ehf. en Airport Associates á Keflavíkurvelli annast losun og hleðslu vélar Delta.

„Hið víðtæka alþjóðlega samgöngunet Delta Air Lines um heiminn býður íslenskum inn- og útflytjendum upp á mikla og hraða vörflutninga um víða veröld. Vörumiðstöð Delta í New York er ein sú tæknivæddasta og fullkomansta í heimi,“ segir Stephan Manigk, svæðisstjóri flutningsþjónustu Delta í Evrópu í tilkynningunni.

„Áætlunarflug Delta í sumar á milli New York og Keflavíkur gerir okkur kleift að flytja sjö tonn af flugfrakt hvora leið. Þetta skapar íslenskum fyrirtækjum víðtæk tækifæri og nýja markaðsmöguleika bæði á Íslandi og um heiminn.“

Flugfélagið flýgur til 347 borga í 64 löndum í öllum heimsálfum og notar til þess 700 þotur.