Íbúðalánasjóður mun undirbúa óverðtryggð lán

Sigurður Erlingsson, framkvæmdastjóri Íbúðalánasjóðs, segir að sér lítist vel á hugmyndir þess efnis að Íbúðalánasjóður bjóði óverðtryggð lán í framtíðinni. Hann segir málið krefjast mikils undirbúnings.

Verðtrygginganefnd skilaði Árna Páli Árnasyni, efnahags- og viðskiptaráðherra, skýrslu í fyrradag. Þar kemur meðal annars fram að nefndin telur að tryggja verði fjölbreyttara framboð á óverðtryggðum lánum og skuldabréfum. Hluti af því er útgáfa ríkissjóðs og Íbúðalánasjóðs á óverðtryggðum skuldabréfum og að Íbúðalánasjóður bjóði upp á óverðtryggð húsnæðislán.

„Ég hef kynnt mér þessar hugmyndir og líst vel á þessar hugmyndir. En það hefur ekkert verið fjallað um þetta í stjórn hjá okkur,“ segir Sigurður. Næsta skref sé að fjalla nánar um þetta og hvernig þessu verði við komið. „Það er alveg ljóst að það krefst töluverðs undirbúnings að koma svona breytingu á,“ segir Sigurður. 

„Það er í sjálfu sér ekki erfitt að bjóða lánið en mun flóknara að fjármagna það. Slíkt krefjist undirbúnings,“ segir Sigurður. Hann bætir því við að hugmyndirnar séu jákvæðar og vissulega skref í rétta átt.

Íbúðalánasjóður býður nú einungis verðtryggð lán.