Sanchez semur við Barcelona

Alexis Sanchez framherji Udinese hefur komist að samkomulagi um persónuleg kjör við stórlið Barcelona. Að sögn forseta Udinese, Franco Soldati, fær Sanchez jafnvirði tæpra 500 milljóna króna í árslaun. Þetta kemur fram í chileskum fjölmiðlum.

Soldati segir að Udinese og Barcelona eigi enn eftir að semja um kaupverð. Því séu félagsskipti Sanchez alls ekki frágengin. Framherjinn hefur líst yfir áhuga á að ganga til liðs við spænsku meistarana og mun Udinese ekki standa í vegi fyrir því.

Soldati segist ekki reikna með því að félagsskiptin gangi í gegn fyrr en í fyrsta lagi í lok mánaðarins.

Sanchez fór á kostum með Udinese í Serie A á nýafstaðinni leiktíð. Liðið lauk keppni í fjórða sæti og tryggði sér þátttökurétt í forkeppni Meistaradeildar Evrópu á næsta tímabili.