Gott skot í Þingvallavatni í gærkvöldi

Við heyrðum í Kristjáni Jónssyni sem var í Þingvallavatni í gær og sá gerði flotta veiði.  Hann byrjaði á Leirutá og fékk þar 4 bleikjur frá 2-4 pund en svo datt takan niður og hann ákveður að færa sig.  Hann fer í Vatnskot og út á litla hólmann og víkina þar fyrir innan.  Þetta var seinni partinn í gær þegar hitastigið fór loksins upp í sumarhita.

Þegar það lyngdi aðeins og bjartasti dagurinn var á enda gekk greinilega mikið af bleikju inná grynningarnar því hann landaði 18 bleikjum og einum 11 punda urriða á tæpum tveim tímum og missti slatta.  Kristján sagði:"Það var svo augljóst að það var mikið líf í vatninu því eins og hendi væri veifað fór fiskur að vaka í víkinni og stundum syntu þær rétt við lappirnar á manni og mikið af þessu voru boltableikjur!"

Hann tók þetta allt á flugu.  Mest á hinn hefðbundna peacock en líka á Peter Ross púpu, Jock Scott og eina heimatilbúna.  Og takið eftir því að urriðinn tók Peacock númer #14 og nelgdi hana alveg ofan í kok!  Kristján segir að það hafi verið eitthvað af mönnum á svæðinu en það hafi þynnst úr hópnum þegar leið á daginn, en eimitt þá fór mest að gerast.  það sýnir sig enn og aftur að þeir fiska sem róa.