Murray slátraði Roddick

Skotinn Andy Murray fór illa með nafna sinn Andy Roddick í undanúrslitum á AEGON Meistaramótinu í tennis í Queen í Englandi í dag. Bandaríkjamaðurinn Roddick átti ekkert svar við stórleik Murrey sem sigraði í tveimur settum 6-3 og 6-1.

Viðureign kappanna hafði verið beðið með nokkurri eftirvæntingu. Murray sem er í fjórða sæti heimslistans var hins vegar of stór biti fyrir Roddick í leik sem tók tæpa klukkustund.

Leikið var á grasi líkt og gert verður á Wimbledon mótinu síðar í mánuðinum. Frammistaða Murray eru góð tíðindi fyrir Breta sem hafa látið sig dreyma um breskan sigur á Wimbledon í langan tíma.

Murray mætir Frakkanum Jo-Wilfried Tsonga í úrslitaleik mótsins á morgun.