Ekkert óvænt í karlaflokki á Wimbledon

Allir fjórir efstu á heimslistanum í tennis komust í dag áfram í fjórðungsúrslit einliðaleiks karla á Wimbledon-mótinu í dag. Fátt var um óvænt úrslit í 16-manna úrslitunum sem fóru öll fram í dag.

Rafael Nadal lenti í smá basli með Argentínumanninn Juan Marin del Potro en vann að lokum, 7-6, 3-6, 7-6 og 6-4. Skotinn Andy Murray komst sömuleiðis áfram eftir þægilegan sigur á Richard Gasquet frá Frakklandi, 7-6, 6-3, 6-2.

Roger Federer tapaði óvænt fyrstu lotunni í viðureign sinni gegn Rússanum Mikhail Youzhny, 7-6, en vann næstu þrjár lotur allar 6-3 og tryggði sér þannig öruggan sigur.

Novak Djokovic er einnig kominn áfram eftir þægilegan sigur á Michael Llodra frá Frakklandi, 6-3, 6-3 og 6-3.

Þess má svo geta að hinn átján ára Ástrali, Bernard Tomic, er einnig kominn áfram í fjórðungsúrslitin eftir að hann lagði Xavier Malisse frá Belgíu, 6-1, 7-5 og 6-4. Hann lagði Robin Söderling, fimmta efsta mann heimslistans, í 32-manna úrslitunum en sjálfur er Tomic í 158. sæti heimslistans.

Ef úrslitin í fjórðungsúrslitunum verða öll eftir bókinni mætast fjórir efstu menn heimslistans í undanúrslitunum. Semsagt Nadal gegn Murray og Federer gegn Djokovic.

En þessir mætast í fjórðungsúrslitunum:

Rafael Nadal (Spáni) - Mardy Fish (Bandaríkjunum)

Andy Murray (Bretlandi) - Feliciano Lopez (Spáni)

Jo-Wilfried Tsonga (Frakklandi) - Roger Federer (Sviss)

Bernard Tomic (Ástralíu) - Novak Djokovic (Serbíu)