Vettel naut sín vel Í Valencia

Sebastian Vettel vann sjötta sigur sinn í Formúlu 1 á árinu í Valencia á Spáni í dag á Red Bull keppnisbíl. Vettel var meira og minna í forystu í mótinu og er kominn með 77 stiga forskot á næsta ökumann í stigakeppni ökumanna.

Vettel er með 186 stig, Mark Webber liðsfélagi hans 109, rétt eins og Jenson Button hjá McLaren. Lewis Hamilton hjá McLaren er með 97 og Fernando Alonso hjá Ferrari 87.

Vettel vann öruggan sigur í dag og var aldrei ógnað verulega.

„Séð utanfrá þá er ég ekki viss um að það hafi mikið virst vera gera í brautinni, en ég nýt þess svo vel þegar þetta er samspil mín og bílsins í hverjum hring. Vitanlega var pressa á mér, ekki síst í ljósi þess að keppnisáætlun mín og Mark og Fernando var ólík. Þeir fóru ýmist fyrr í hlé eða síðar", sagði Vettel eftir sigurinn í dag.



„Ég var með forskot á þá fyrir fyrsta þjónustuhléið, en kom út nokkuð nálægt þeim, (en á undan) þannig að ég varð að keyra stíft, en einnig að meta dekkin og ímynda mér hvernig hlutinir myndu ganga. Maður er að reyna að sjá fyrir sér keppnisáætlunina, þannig að í hverjum hring er þetta á milli mín og bílsins.

„Ég nýt þessarar brautar. Í fyrra gekk allt smurt og aftur núna. Liðið hefur unnið frábæra vinnu í undirbúningi bílsins. Þó við komum hér á hverju ári og búumst við því að þetta geti orðið snúið, þá mættum við og allt gekk snuðrulaust. Ég er auðvitað mjög ánægður með úrslitin", sagði Vettel.