Voðaverkin voru grimm - en nauðsynleg

Fjöldamorðinginn Anders Behring Breivik, sem varð að minnsta kosti níutíu og tveimur að bana með sprengju í miðborg Oslóar og í skotárás á eyjunni Útey í gær, segir að voðaverkin hafi verið grimm - en nauðsynleg.

Þetta kom fram í máli verjanda hans við norska fjölmiðla nú undir kvöld. Anders verður yfirheyrður aftur á morgun en hann mun hafa verið samvinnuþýður í yfirheyrslum lögreglunnar. Hann verður leiddur fyrir dómara á mánudaginn þar sem krafist verður gæsluvarðhalds yfir honum og segir lögfræðingur hans að skjólstæðingur sinn sé tilbúinn að útskýra mál sitt í réttarsalnum.

Hvort að norska þjóðin og umheimurinn, taki mark á útskýringum árásarmannsins verður að teljast afar ólíklegt.