Vettel fullur sjálfstrausts á ný

Sebastian Vettel hjá Red Bull Formúlu 1 liðinu er fremstur á ráslínu fyrir ungverska kappaksturinn á sunnudag, eftir góða frammistöðu í tímatökunni í dag. Hann var á undan Lewis Hamilton og Jenson Button á McLaren.

„Þetta var góð tímataka hjá okkur. McLaren bílarnir voru mjög fljótir, þannig að við fórum rétta leið og mér leið miklu betur í morgun. Tímatakan gekk upp og ég er ánægður með árangurinn", sagði Vettel, en í gær náði Hamilton besta tíma á báðum æfingum.

Þjónustumenn Vettels unnu í bíl hans í nótt, þar sem hann var ekki ánægður með gang mála og gerðu endurbætur á bílnum.

„Við breyttum í nótt og strákarnir eiga þakkir skildar fyrir erfiðisvinnu og þeir sváfu ekki mikið og árangurinn er því ánægjulegur fyrir þá. Ég er þakklátur og er kominn með sjálfstraustið aftur og líður miklu betur í bílnum og hlakka til mótsins", sagði Vettel.

Bein útsending í opinni dagskrá er frá mótinu í Ungverjalandi kl. 11.40 í opinni dagskrá á Stöð 2 Sport.

Brautarlýsing og tölfræði er á kappakstur.is.