Djokovic fór illa með Berlocq

Efsti maður heimslistans, Novak Djokovic, var í banastuði á Opna bandaríska meistaramótinu í tennis í nóttþegar hann lagði Argentínumanninn Carlos Berlocq í þremur settum 6-0, 6-0 og 6-2.

Spilamennska Djokovic þótti á köflum svo góð að áhorfendur vorkenndu Berlocq sem spilaði afar vel en átti ekki möguleika gegn sjóðandi heitum Serbanum.

„Tvö fyrstu settin voru fullkomin. Ég gæti ekki spilað betur. Ég svaraði öllum skotum hans, ég kláraði stigin þegar þess þurfti og vann mörg stig þar sem hann átti ekkert svar við skotum mínum. Uppgjöfin var í lagi og svör mín við uppgjöfum hans voru frábær,“ sagði Serbinn að leik loknum.

Litlu munaði að Berlocq yrði fyrsti keppandinn í 24 ár til þess að tapa leik án þess að vinna lotu. Argentínumaðurinn, sem er númer 74 á heimslistanum, náði að bjarga andlitinu og vinna tvær lotur í lokasettinu.

„Ég vorkenndi honum á köflum í þriðja settinu því hann reyndi eins og hann gat að komast aftur inn í leikinn. Ég verð að virða hann fyrir að hafa reynt,“ sagði Djokovic sem kominn er í 3. umferð mótsins.

Í myndbandinu má sjá baráttu Djokovic og Berlocq um stig í leiknum. Svo virðist sem Djokovic sé hreinlega að leika sér að Berlocq.

Roger Federer er einnig kominn í 3. umferð eftir öruggan sigur á Dudi Sela frá Ísrael 6-3, 6-2 og 6-2. Federer hefur fimm sinnum staðið uppi sem sigurvegari á mótinu.