Alexis Sanchez verður frá í tvo mánuði

Knattspyrnumaðurinn, Alexis Sanchez, meiddist nokkuð illa í gær þegar Barcelona var í heimsókn hjá Real Sociedad.

Þessi 22 ára leikmaður Barcelona var borinn af velli eftur rúmlega hálftíma leik, en nú er það orðið ljóst að Sanchez verður frá keppni í um tvo mánuði.

Sanchez sleit vöðva í aftanverðu læri og telja læknar Börsunga að hann verði frá í 8 vikur.

Barcelona var 2-0 yfir í hálfleik en leiknum lauk með 2-2 jafntefli sem verða að teljast virkilega óvænt úrslit.

Barcelona tapaði því dýrmætum stigum í gær á meðan Real Madrid sigraði Getafe örugglega. Real Madrid hefur því sex stig eftir tvær umferðir en Barcelona fjögur stig.