Birti mynd af sér með klámmyndastjörnu og allt varð brjálað

Rob Gronkowski, leikmaður New England Patriots í NFL-deildinni, þurfti að biðjast afsökunar eftir að hafa setið fyrir á mynd með klámmyndastjörnu á Twitter.

"Ég ætlaði alls ekki að særa neinn né kasta rýrð á félagið né eiganda þess, Robert Kraft. Þetta var bara mynd og ekkert meira," sagði Gronkowski en hann átti aldrei von á því að myndin yrði eitthvað vandamál.

Fjölmiðlar átu málið upp og eigandi Patriots, Kraft, var allt annað en sáttur við þessa hegðun hjá Gronkowski.

Það var klámmyndastjarnan BiBi Jones sem birti myndina en hana má sjá hér með fréttinni. Gronkowski er í miklu uppáhaldi hjá henni.

Gronkowski vildi ekki tjá sig meira um málið. Jones hefur þó látið hafa eftir sér að ekkert hafi gerst á milli þeirra þó svo hún væri spennt fyrir leikmanninum.