Guardiola leyfði sjö mönnum að fara snemma í jólafrí

Pep Guardiola hefur ekki mikla áhyggjur af bikarleik liðsins á móti Hospitalet á Camp Nou á fimmtudagskvöldið. Hann gaf sjö leikmönnum leyfi til að fara í jólafrí eftir sigurinn í Heimsmeistarakeppni félagsliða á sunnudaginn.

Suður-Ameríkubúarnir og Seydou Keita frá Malí fengu allir að fara strax í jólafrí og þurfa ekki að mæta á æfingu fyrr en 29. desember. Þetta eru Argentínumennirnir Lionel Messi og Javier Mascherano, Brasilíumennirnir Dani Alves, Adriano Correia og Maxwell og svo Sílemaðurinn Alexis Sánchez.

Þetta eru allt leikmenn liðsins sem eiga fjölskyldur lengst í burtu og þiggja því þetta tíu daga jólafrí þjálfarans með þökkum.

Barcelona vann fyrri leikinn á móti Hospitalet 1-0 á útivelli en það lið sem hefur betur í tveimur leikjum kemst í sextán liða úrslit keppninnar.