Vöruskiptin bötnuðu um 31 milljarð milli ára

Samkvæmt bráðabirgðatölum voru fyrir allt árið 2010 fluttar út vörur fyrir 560,6 milljarða króna en inn fyrir 442,1 milljarð króna. Afgangur var á vöruskiptunum við útlönd sem nam 118,6 milljörðum en árið áður voru þau hagstæð um 87,3 milljarða á sama gengi. Vöruskiptajöfnuðurinn var því 31,2 milljörðum króna hagstæðari en árið áður.

Fjallað er um málið á vefsíðu Hagstofunnar. Þar segir að samkvæmt bráðabirgðatölum voru í desembermánuði fluttar út vörur fyrir 49,6 milljarða króna og inn fyrir 36,4 milljarða króna. Vöruskiptin í desember voru því hagstæð um 13,1 milljarð króna. Í desember 2009 voru vöruskiptin hagstæð um 11,6 milljarða króna á sama gengi.

Í bráðabirgðatölum fyrir árið hefur verið leiðrétt fyrir verslun með skip og flugvélar á árinu 2010.

Samkvæmt bráðabirgðatölum fyrir árið 2010 var heildarverðmæti vöruútflutnings 15,7% meiri en árið áður á föstu gengi.

Iðnaðarvörur voru 55,5% alls útflutnings og er þetta þriðja árið í röð, frá því að skráning á árlegum útflutningi hófst með reglubundnum hætti árið 1862, sem hlutdeild iðnaðarvara er hærri en sjávarafurða.

Verðmæti iðnaðarvara var 31,9% meira á árinu 2010 en árið áður og vó ál þyngst í útflutningnum. Sjávarafurðir voru 39,3% alls útflutnings og var verðmæti þeirra 9,2% meira en árið 2009. Stærsti liður útfluttra sjávarafurða var frystur heill fiskur og jókst útflutningur hans um 41,7% frá árinu 2009. Sala á skipum og flugvélum dróst saman á árinu.

Samkvæmt bráðabirgðatölum var verðmæti vöruinnflutnings á árinu 2010 11,3% meira á föstu gengi en á sama tíma árið áður. Stærstu liðir innflutnings voru hrá- og rekstrarvara með 32,8% hlutdeild og fjárfestingarvara með 22,9% hlutdeild.

Af einstökum liðum varð mest aukning, í krónum talið, í hrá- og rekstrarvöru 20,2% (24,4 milljarðar), fjárfestingavöru 18,2% (15,6 milljarðar) og eldsneyti og smurolíu 16,8% (8,3 milljarðar) en samdráttur varð í innflutningi á flutningatækjum 21,9% (8,4 milljarðar).