Vestia tapaði rúmum 400 milljónum árið 2009

Eignarhaldsfélagið Vestia tapaði 413 milljónum króna á árinu 2009, en félagið var stofnað í maí á því ári. Eigið fé þess var jákvætt um 2,5 milljarða króna. Þetta kemur fram í ársreikningi Vestiu sem var skilað inn til fyrirtækjaskrár í gær.

Fjallað er um málið í Viðskiptablaðinu. Framtakssjóður Íslands keypti Vestiu af nýja Landsbankanum í ágúst síðastliðnum á 19,5 milljarða króna. Meðal eignanna voru Icelandic Group, Húsasmiðjan og Plastprent auk 62% hlutar í Teymi.

Eignir félagsins voru metnar á 32 milljarða króna í árslok 2009 en skuldir þess á 29,5 milljarða króna. Starfsmenn voru að meðaltali sex og fengu samtals 27,4 milljónir króna greidd í laun þann hluta ársins sem Vestia starfaði. Framkvæmdastjóri Vestiu, Steinþór Baldursson, þáði 5,9 milljónir króna í laun.