Gæti reynt á nýjar framlengingarreglur í kvöld

Það búast flestir við því að Super Bowl-leikurinn milli Pittsburgh Steelers og Green Bay Packers í kvöld verði afar jafn og spennandi. Jafnvel svo spennandi að það þurfi að framlengja en það yrði í fyrsta skipti sem Super Bowl-leikur yrði framlengdur.

Fari svo þá mun reyna á nýjar framlengingarreglur. Þá erum við að tala um reglur sem fæstir leikmenn liðanna hafa kynnt sér.  Blaðamenn vestra hafa verið duglegir að kanna það og komist að því að fæstir leikmannanna vita hvað bíður ef leikurinn verður framlengdur.

Gamla reglan er sú að það lið sem skoraði fyrst í framlengingunni vann. Sú regla á enn við í deildarkeppninni en búið er að breyta reglunum í úrslitakeppninni.

Nú er aðeins hægt að vinna leik beint í framlengingu með því að skora snertimark. Ef lið A skorar aftur á móti aðeins vallarmark þá fær lið B tækifæri til þess að svara fyrir sig.

Ef lið B jafnar með vallarmarki þá heldur leikurinn áfram þar til öðru liðinu tekst að skora.

Ef lið B skorar aftur á móti snertimark þá er það búið að vinna. Takist liði B ekki að skora í sókninni þá vinnur lið A leikinn.

Þessi regla var sett eftir leik Minnesota og New Orleans í fyrra sem var rosalegur. Endaði með sigri New Orleans sem skoraði 40 metra vallarmark í framlengingu. Eigendum liðanna fannst það snubbóttur endir á rosalegum leik og ákváðu því að breyta til.