Mál Gattuso tekið fyrir á mánudag - Flamini ekki refsað

Knattspyrnusamband Evrópu hefur staðfest að rannsókn sé hafin á hegðun Gennaro Gattuso, leikmanni AC Milan, eftir leik liðsins gegn Tottenham í Meistaradeild Evrópu í gær.

Gattuso hnakkreifst við Joe Jordan, aðstoðarþjálfara Tottenham, bæði á meðan leiknum stóð og svo aftur eftir hann.

Í síðara skiptið skallaði Gattuso Jordan og hefur síðan þá viðurkennt að hann hafi misst stjórn á skapinu og beðist afsökunar á atvikinu.

Aganefnd UEFA mun koma saman á mánudaginn þar sem að mál Gattuso verða tekin fyrir formlega.

Gattuso var með gult spjald á bakinu fyrir leikinn í gær og fékk aftur gult í leiknum í gær. Hann verður því hvort eð er í banni í síðari viðureign liðanna á White Hart Lane.

Talsmaður UEFA sagði þó að ekkert væri hægt að gera í máli Mathieu Flamini, sem tæklaði Vedran Corluka í gær. Harry Redknapp, stjóri Tottenham, sagði tæklinguna verðskulda rautt spjald.

Dómari leiksins gaf Flamini hins vegar aðeins áminningu fyrir brotið og er ekki hægt að breyta þeirri refsingu eftir á.