Salan á IG skýrist í þessum mánuði

Fréttaskýring

Hvað líður sölunni á Icelandic Group?

Stefnt er að því að ljúka í þessum mánuði viðræðum Framtakssjóðs Íslands og norður-evrópska fjárfestingarsjóðsins Triton um kaup þess síðarnefnda á hlut í Icelandic Group. Finnbogi Jónsson, framkvæmdastjóri Framtakssjóðsins, segist gera ráð fyrir að málið skýrist á næstu tveimur vikum. „Við eigum í viðræðum um hugsanlegt samstarf og sölu á hlut, en það er ekki komin nein niðurstaða í það hversu stór sá hlutur kynni að verða. Það er mjög jákvætt að finna þann áhuga sem er á félaginu sem staðfestir þá trú sem við höfum á framtíðarmöguleikum þess," segir hann.

Á morgun, 7. janúar, rennur út tilboð kanadíska fisksölufyrirtækisins High Liner Foods um viðræður um kaup á IG. Líkt og fram kemur í frétt blaðsins í gær er fyrirtækið, með fyrirvara um áreiðanleikakönnun, tilbúið að greiða sem nemur 52 milljörðum króna fyrir erlenda starfsemi IG.

Mat greinenda er að gengju slík kaup í gegn myndi Framtakssjóðurinn hagnast umtalsvert á sölunni, en IG er eitt þeirra fyrirtækja sem fylgdu í kaupum sjóðsins á Vestia, eignarhaldsfélagi Landsbankans.

Miðað við skuldastöðu IG, eins og hún birtist í síðasta uppgjöri félagsins í júní 2010 og það verð sem sjóðurinn lét fyrir Vestia, herma heimildir blaðsins að áætla megi að Framtakssjóðurinn hafi keypt IG á rúma fjörutíu milljarða króna. Verð á borð við það sem kanadíska fyrirtækið nefnir gæti því þýtt fimmtán til tuttugu prósenta arðsemi Framkvæmdasjóðsins af sölunni.

Finnbogi áréttar hins vegar að enn liggi ekkert fyrir og allar upphæðir geti breyst að aflokinni áreiðanleikakönnun. Þá sé enn stefnt að því að skrá félagið á markað þegar seldur hafi verið kjölfestuhlutur eða erlend starfsemi út úr félaginu. „En stefnan er að halda sölukerfi félagsins í meirihlutaeigu Íslendinga," segir hann.

Sumir viðmælenda blaðsins hafa gagnrýnt að Framtakssjóðurinn skyldi ekki efna til formlegra og opnara tilboðsferlis í sölunni á Icelandic Group. Um leið er ljóst að sjóðnum ber engin skylda til að fara slíka leið.

Finnbogi áréttar að töluverður áhugi hafi verið meðal fjárfesta á Icelandic Group og vísar á bug gagnrýni um ógagnsæi. „Frá því í september hefur legið fyrir að við vildum fá með okkur samstarfsaðila," segir hann og kveður því alla hafa setið við sama borð í þeim efnum. „Í kjölfar þeirrar yfirlýsingar gáfu margir aðilar sig fram og við ákváðum í kjölfarið að taka upp viðræður við Triton og gefa okkur hæfilegan tíma til þess," segir hann og áréttar að fyrir Framtakssjóðnum vaki tvennt, annars vegar að hámarka verðmæti og hins vegar að verja íslenska hagsmuni við sölu sjávarafurða.

Þá telur Finnbogi alls ekki hægt að draga þá ályktun að Landsbankinn hafi leikið af sér með því að selja frá sér Icelandic Group. „Við höfðum alveg hugsað okkur að eiga félagið til margra ára og það eitt breytir samningsstöðu og kann að hækka verð. Landsbankinn á tæplega 30 prósenta hlut í Framtakssjóðnum og nýtur þess því ef gott verð fæst fyrir hluta af eignum félagsins nú."olikr@frettabladid.is